केंद्रीय मंत्री हरदीप सिंग पुरी यांनी स्पष्ट केले आहे की, भारतात लॉकडाऊन लागू करण्याचा कोणताही प्रस्ताव नाही. या स्पष्टीकरणामुळे देशभरात सुरू असलेल्या लॉकडाऊनच्या चर्चांना पूर्णविराम मिळाला आहे. गेल्या ४८ तासांत पश्चिम आशियातील वाढत्या तणावामुळे लॉकडाऊन लागणार असल्याच्या अफवांनी सर्वसामान्यांमध्ये भीती निर्माण केली होती.
पंतप्रधान नरेंद्र मोदी यांनी संसदेच्या अर्थसंकल्पीय अधिवेशनात पश्चिम आशियातील संघर्षावर भाष्य करताना देशवासियांना संयम बाळगण्याचे आवाहन केले होते. मात्र, या विधानाचा चुकीचा अर्थ लावून सोशल मीडियावर लॉकडाऊन लागणार असल्याचे मेसेज आणि व्हिडिओ व्हायरल झाले. यामुळे लोकांनी जीवनावश्यक वस्तूंचा साठा करण्यासाठी धावपळ सुरू केली होती.
हरदीप सिंग पुरी यांनी या गंभीर परिस्थितीवर प्रतिक्रिया देताना एक्सवर पोस्ट करत सरकारची भूमिका स्पष्ट केली. त्यांनी म्हटले, “देशात लॉकडाऊन लागणार असल्याच्या बातम्या पूर्णपणे खोट्या आहेत. मी हे स्पष्ट करू इच्छितो की, भारत सरकारकडे असा कोणताही प्रस्ताव सध्या विचाराधीन नाही. अशा कठीण काळात अफवा पसरवणे आणि भीतीचे वातावरण निर्माण करणे हे अत्यंत बेजबाबदारपणाचे आणि हानिकारक आहे.”
केंद्रीय मंत्री पुरी यांनी इंधन आणि पुरवठा साखळीवर सरकारचे लक्ष असल्याचे सांगितले. जागतिक स्तरावर कच्च्या तेलाच्या किमतीत झालेली मोठी वाढ चिंतेची बाब असल्याचे त्यांनी मान्य केले. गेल्या महिनाभरात कच्चे तेल ७० डॉलर प्रति बॅरलवरून थेट १२२ डॉलरवर पोहोचले आहे. तरीही, पंतप्रधान मोदींच्या नेतृत्वाखाली भारत सरकार देशातील इंधन, ऊर्जा आणि जीवनावश्यक वस्तूंचा पुरवठा खंडित होणार नाही याची काळजी घेत आहे.
हरदीप सिंग पुरी यांनी सांगितले की, “रिअल-टाइम मॉनिटरिंगद्वारे सर्व हालचालींवर लक्ष ठेवले जात आहे. कोणत्याही आव्हानाचा सामना करण्यास सरकार सज्ज आहे.” त्यांनी याबाबत अधिक माहिती देताना, “जागतिक स्तरावर इंधनाचे दर ३० ते ५० टक्क्यांनी वाढले असताना, भारत सरकारने एक्साइज ड्युटी कमी करून जनतेला दिलासा देण्याचा प्रयत्न केला आहे. उत्तर अमेरिका, युरोप आणि आफ्रिकी देशांच्या तुलनेत भारतातील परिस्थिती नियंत्रणात ठेवण्यासाठी सरकार सक्रिय पावले उचलत आहे.”
या सर्व घटनाक्रमामुळे देशातील नागरिकांमध्ये एक प्रकारची असुरक्षितता निर्माण झाली होती. तथापि, केंद्रीय मंत्र्यांच्या या स्पष्टीकरणामुळे नागरिकांना दिलासा मिळाला आहे. सरकारने या संकटाच्या काळात नागरिकांना योग्य माहिती देणे आणि अफवांवर नियंत्रण ठेवणे आवश्यक आहे.
पत्रकार -
