चांदवड तालुक्यातील हजारो क्विंटल कांदा सडला; शेतकरी आर्थिक संकटात
काजीसांगवी / चांदवड (प्रतिनिधी उत्तम आवारे)
चांदवड तालुक्यात रब्बी हंगामातील पहिल्या टप्प्यात लागवड करण्यात आलेला पोळ कांदा पीक परतीच्या पावसामुळे मोठ्या प्रमाणात सडला असून शेतातील हजारो क्विंटल कांदा निकामी झाल्याचे चित्र तालुक्यातील डोंगरपट्टा भागात सर्वत्र पाहायला मिळत आहे.
मागील दोन महिन्यांपूर्वी झालेल्या परतीच्या पावसाने व सातत्याने सुरू असलेल्या अतिवृष्टीने कांदापीकाला जोरदार फटका बसला. सध्या काढणीला आलेल्या पिकात मोठ्या प्रमाणावर सड दिसत आहे.
उत्पादनात मोठी घट
शेतकऱ्यांच्या मते, पोळ कांद्याचे एकरी सरासरी उत्पादन ५० ते ६० क्विंटल मिळणे अपेक्षित होते, मात्र सध्या केवळ २० ते २५ क्विंटल उत्पादन मिळत असल्याने शेतकऱ्यांचे मोठे आर्थिक नुकसान झाले आहे.
तसेच कांदा पिकावर खर्च वाढत असताना बाजारभाव समाधानकारक मिळत नसल्याने, उत्पादन खर्च वजा करता शेतकऱ्यांना तोट्याचे गणित बसत आहे.
—
निर्यात बाजारपेठेत पुरवठा घट
चांदवड तालुक्यातील डोंगरपट्टा भागात निर्यातक्षम पोळ कांद्याचे उत्पादन होते व हा कांदा वाशी, दिल्ली, अहमदाबाद, इंदोर, बडोदरा आदी मोठ्या बाजारपेठेत पाठविला जात असे.
मागील वर्षी दररोज ५० ते ६० ट्रक कांदा बाहेर पाठविला जात होता; परंतु यंदा पिकाची मोठ्या प्रमाणात नासाडी झाल्याने मागणी असूनही पुरवठा कमी पडत आहे.
—
शेतकऱ्यांच्या प्रतिक्रिया
खंडेराव पेंढारी (शेतकरी, हरणुल)
“परतीच्या पाऊस आणि अतिवृष्टीमुळे माझ्या शेतातील ५०% पेक्षा जास्त कांदा सडला. फक्त २० ते २५ क्विंटल उत्पादन मिळत आहे. उत्पादनाचा खर्च जास्त असून बाजारभाव वजा करता तोटाच होत आहे.”
दादाभाऊ वाळके (शेतकरी, काजीसांगवी)
“काढणीच्या अवस्थेलाच कांदे पूर्णपणे सडले. माझ्या दोन एकर क्षेत्रातील पिकाचे नुकसान झाल्याने सर्व कांदा ट्रॅक्टरने नांगरून टाकला.”
पत्रकार -
