नाशिक – जिल्ह्यात हलक्या डिझेल ऑईलच्या (एलडीओ) नावाखाली डिझेलच्या अवैध विक्रीचा व्यवसाय वाढला आहे, ज्यामुळे पेट्रोलपंप चालकांमध्ये नाराजी पसरली आहे. गेल्या महिन्याभरापासून या अवैध व्यवसायाविरुद्ध तक्रार करूनही प्रशासनाने कोणतीही कारवाई केलेली नाही. धोकादायकपणे चालणाऱ्या या डिझेल विक्रीच्या बेकायदेशीर व्यवसायावर पंधरवड्यात कारवाई न केल्यास, जिल्ह्यातील सर्व पेट्रोलपंप चालक ३१ ऑक्टोबर रोजी बंदची हाक देणार आहेत.
नाशिक जिल्हा पेट्रोल डीलर्स वेल्फेअर संघटनेच्या बैठकीत हा निर्णय घेण्यात आला. संघटनेच्या सदस्यांनी विविध भागांतील बेकायदेशीर एलडीओ विक्री केंद्रांना भेट देऊन निरीक्षण केले. त्यावेळी अनेक धक्कादायक गोष्टी समोर आल्या. याबाबतची माहिती निवेदनाद्वारे जिल्हा प्रशासनाला देण्यात आली. बहुसंख्य एलडीओ विक्री केंद्रे कृषी जमिनीवर कोणत्याही अकृषिक परवानगीशिवाय व्यवसायिक विक्री करीत असल्याचे आढळून आले. कोणत्याही केंद्राकडे खरेदीची पावती नसून, या केंद्रांवर तीन ते सहा हजार लिटर क्षमतेच्या प्लास्टिकच्या टाक्यांमध्ये हलके डिझेल ऑईल साठवले जाते, ज्यासाठी विस्फोटक विभागाची परवानगी घेतलेली नाही. विक्री करणाऱ्या केंद्रांवर “वाणिज्य वापरासाठी नाही” असे लिहिलेले असून, वजनमाप विभागाकडून तपासणी न करता सर्रास विक्री सुरू आहे. डिझेल वाहनांमध्ये एलडीओ भरले जाते, आणि कोणालाही पावती दिली जात नाही. पोलीस, तहसीलदार, तलाठी यांपैकी कोणाचाही ना हरकत दाखला या केंद्रांनी घेतलेला नाही, हे पाहणीत स्पष्ट झाले.
एलडीओ केवळ बॉयलर वा अन्य उष्णता संबंधित उपकरणांमध्ये वापरले जाते, परंतु या केंद्रांच्या परिसरात एलडीओ वापरण्यास परवानगी असल्याचे कोणतेही साधन आढळले नाही. संघटनेला खात्री आहे की या केंद्रांवर प्रत्यक्षात एलडीओ नसून डिझेलच विकले जात आहे.
पाहणीत आढळलेल्या इतर मुद्द्यांवर चर्चा करण्यासाठी संघटनेने जिल्हाधिकाऱ्यांची भेट घेण्यासाठी वेळ मागितली आहे. अवैध इंधन विक्रीमुळे शासकीय महसूल बुडत आहे, आणि ग्राहक, शेतकरी तसेच शासकीय महसूल या सर्वांचे नुकसान होत आहे. यासाठी संबंधित विभागांची पथके तयार करून सर्व एलडीओ केंद्रांची तपासणी करण्याची मागणी संघटनेचे अध्यक्ष विजय ठाकरे यांनी केली आहे. या सर्व घटनाक्रमामुळे पेट्रोलपंप चालकांमध्ये अस्वस्थता पसरली आहे. लाखो रुपये खर्चून उभ्या राहिलेल्या आणि शासनाला दररोज कोट्यवधींचा महसूल देणाऱ्या पेट्रोलपंप व्यवसायाला आधीच विविध समस्यांचा सामना करावा लागत आहे. अवैध इंधन विक्रीबाबत महिनाभरापासून पाठपुरावा सुरू असताना प्रशासनाने कोणतीही कारवाई केलेली नाही, उलट हा व्यवसाय अधिकच विस्तारत आहे. संघटनेच्या बैठकीत निर्णय घेण्यात आला की, पंधरवड्यात प्रशासनाने कारवाई न केल्यास, ३१ ऑक्टोबर रोजी जिल्ह्यातील सर्व ४५० पेट्रोलपंप चालक लाक्षणिक बंद पाळून निषेध व्यक्त करतील.
तालुका सहकार उपनिबंधकांकडून या अवैध व्यवसायाला प्रोत्साहन दिले जात असल्याचा आरोपही संघटनेने केला आहे. संघटनेच्या मते, तालुका सहकार उपनिबंधकांनी बैठका घेऊन खासगी दलालांना बोलावून या व्यवसायाला प्रोत्साहन दिले आहे, ज्यामुळे इंधनासंबंधी शासकीय परिपत्रकाचे उल्लंघन सर्रास होत आहे.
पत्रकार -
